LDK: Vjosa Osmani nominohet kandidate për kryeministre të Kosovës

Kryesia e LDK-së ka vendosur për emrin e kandidates për kryeministre të Kosovës.

«Arritëm marrëveshje me konsensus të plotë. Ka qenë vendim unanim i gjithë kryesisë që Vjosa Osmani të jetë kandidate për kryministre të Republikës së Kosovës», tha kreu u LDK-së, Isa Mustafa. Ndërsa Lutfi Haziri do të jetë bartës i fushatës zgjedhore për zgjedhjet e 6 tetorit 2019. «Ia kam deleguar kompetencat e mia gjatë fushatës”, ka thënë Mustafa, përcjell albinfo.ch.

Kurse Vjosa Osmani, me këtë rast, ka pasur një premtim për qytetarët.

“I garantoj qytetarët që nga sot nuk do të ndihen sikurse nuk kanë zë. Falënderoj secilin aktivist të LDK-së, që pavarësisht të gjithave, nuk dyshuan se kjo ishte e vetmja zgjidhja e qëlluar. Vetëm si ekip do të arrijmë sukses. Bashkë me Lutfi Hazirin. Faleminderit shumë edhe një herë për besimin.”, ka thënë e nominuara për kandidate e LDK-së për kryeministre.

Sot edhe zyrtarisht presidenti kosovar, Hashim Thaçi, ka caktuar datën e mbajtjes së zgjedhjeve të parakohshme parlamentare.