Dietikon (ZH): Zamfina Rexhaj prezanton librin e saj mbi luftën në Kosovë

Libri "Gefangen zwischen Zukunft und Vergangenheit" tregon historinë prekëse të Luftës së Kosovës, nga viti 1989 deri në vitin 1999

Më 27 qershor 2024, në orën 20:00, në Bibliotekën e Qytetit Dietikon do të zhvillohet një lexim i veçantë. Autorja e re, Zamfina Rexhaj, do të lexojë nga vepra e saj më e re në gjuhën gjermane “Gefangen zwischen Zukunft und Vergangenheit” (E kapur, në mes të ardhmes dhe të shkuarës) dhe do të shoqërojë pjesëmarrësit në një udhëtim letrar, thuhet në ftesën e bërë nga biblioteka, shkruan albinfo.ch.

Zamfina Rexhaj është një autore 25-vjeçare, me prejardhje nga Istogu i Kosovës, e cila shkruan në gjuhën gjermane.

“Gefangen zwischen Zukunft und Vergangenheit” tregon historinë prekëse të Luftës së Kosovës nga viti 1989 deri në vitin 1999 dhe ndriçon vështirësitë me të cilat njerëzit u ballfaquan gjatë arratisjes së tyre drejt një vendi të ri. Me ndjeshmëri të madhe dhe fuqi letrare, Zamfina Rexhaj përshkruan përvojat dhe sfidat e thella njerëzore të kësaj periudhe.

Pjesëmarrësit do të kenë mundësinë të bëjnë pyetje dhe të hyjnë në dialog të drejtpërdrejtë me autoren.

Biblioteka e Qytetit Dietikon është e lumtur të organizojë këtë ngjarje kulturore dhe mirëpret entuziastët e letërsisë nga rajoni. Leximi premton të jetë një mbrëmje plot frymëzim dhe zbulime letrare.

Hyrja në ngjarje është falas, megjithatë, kërkohet një regjistrim paraprak, pasi vendet janë të kufizuara. Regjistrimet mund të bëhen me telefon në 044 744 36 36 ose me email në bibliothek@dietikon.ch.

 

---