Lidhjet e trenave midis Zvicrës dhe Parisit do të zvogëlohen

Vendimi u mor sepse udhëtarët nga nëntë rajone franceze, përfshirë Île-de-France ku ndodhet Parisi, i nënshtrohen një karantine 10-ditore me të hyrë në Zvicër

Lidhjet ditore midis Gjenevës dhe kryeqytetit francez do të zvogëlohen duke filluar të hënën, 28 shtator. TGV Lyria, një tren me shpejtësi të lartë që operohet bashkërisht nga Hekurudhat Federale Zvicerane (SBB) dhe Kompania Kombëtare e Hekurudhave Franceze (SNCF) po zvogëlon numrin e lidhjeve hekurudhore midis Zvicrës dhe Francës, shkruan the local, përcjell Albinfo.ch

Vendimi u mor sepse udhëtarët nga nëntë rajone franceze, përfshirë Île-de-France ku ndodhet Parisi, i nënshtrohen një karantine 10-ditore me të hyrë në Zvicër. Shërbimet nga stacioni Cornavin i Gjenevës në Gare de Lyon të Parisit do të reduktohen nga shtatë në katër vajtje-ardhje çdo ditë. Nga Cyrihu, do të ketë katër trena në të dy drejtimet në vend të pesë.

Sidoqoftë, lidhjet e përditshme midis Lozanës dhe Parisit përmes Dijon mbeten të pandryshuara me tre vajtje-ardhje. Të gjitha biletat e blera për trenat e anuluar deri më 1 nëntor mund të ndryshohen ose të rimbursohen falas. Ndërsa disa nga shërbimet midis Zvicrës dhe Francës janë pezulluar, SBB njoftoi se lidhjet e natës që lidhin Zvicrën me destinacionet kryesore në Holandë, Spanjë dhe Itali do të zgjerohen nga gjashtë në 10 linja duke filluar në 2021.

---