Ligji anti- mafi, ende largë miratimit

Qeveria e Kosovës ende nuk e ka hartur ligjin anti-mafi, nëpërmjet të cilit do të krijoheshin mekanizma për konfiskimin e pasurisë për të gjithë ata zyrtarë që janë bërë milionerë paligjshmë.

Vonesat për hartimin e këtij ligji thuhet se po prolongohen qëllimisht nga frika se disa zyrtarë qeveritarë, por edhe komunalë, mund të ndëshkohen nga zbatimi i këtij ligji, shkruan Zëri.Edhe pse kryeministri Hashim Thaçi vitin e kaluar pati proklamuar nismën për nxjerrjen e një ligji të tillë, kjo ka mbetur në suazat e deklaratave. 

Kosova, ndërkaq, ka mbetur i vetmi vend në rajon që vazhdon të përballet me një problem parësor për konfiskimin e pasurisë së fituar në mënyrë të paligjshme, për shkak të mungesës se një ligji themelor që do t’i obligonte autoritetet ta konfiskojnë pasurinë e fituar në “të zezë”.

Derisa zyrtarët qeveritarë thonë se janë duke e hartuar ligjin anti-mafi, i cili sipas tyre shumë shpejt do t’i procedohet Kuvendit për aprovim, megjithatë deputetët e taborit opozitar, por edhe shoqëria civile, thonë se për shkak të mungesës së vullnetit politik nga Qeveria e Kosovës po zvarritet nxjerrja e një ligji aq të rëndësishëm për Kosovën.