Lirohen si të pafajshëm të dyshuarit për vrasjen e Viktor B.

Prokuroria supozon se Viktor B. pasi ka vrarë 4 persona, ka qëlluar veten ose në tollovinë e krijuar, është vrarë aksidentalisht nga shkrepja e revoles së vet

Ka kaluar afër një vit nga dita kur shqiptari me shtetësi zvicerane Viktor B. kishte vrarë katër kolegë të tij të punës  në kantinën e fabrikës së drurit Kronospan, në Menznau të Lucernit. Siç është njoftuar gjerësisht edhe nga albinfo.ch, me atë rast ishte vrarë  edhe vetë Viktor B., nga fshati Nec i Gjakovës. 

Rrethanat e vrasjes së tij kanë qenë që në fillim të paqarta, ndërsa tre persona të pranishëm në vendin e  krimit qenë marrë në burg për hetime. Ndërkohë, prokuroria e përgjithshme e Lucernit njofton se për mungesë provash, ka ndërprerë hetimet kundër tre të dyshuarve në fjalë. Bazuar në këtë vendim, ata konsiderohen se nuk kanë përgjegjësi për veprën për të cilën ngarkoheshin.

Në momentin kur kishte ndodhur krimi, tre personat e dyshuar kishin qenë në kantinën e fabrikës, aty ku dorasi kishte shtënë me armë ndaj të tjerëve dhe ku në fund, në tollovi e sipër ishte vrarë edhe vetë i qëlluar nga një plumb në kokë. Prokuroria supozon se Viktor B. me këtë rast ka qenë vetë ai që e ka qëlluar veten me plumb ose në tollovinë e krijuar, vetëvrasja ka mundur të ndodhë aksidentalisht, me ç`rast ai e ka shkrepur pa qëllim plumbin nga i cili ka gjetur vdekjen.

Motivi vazhdon të mbetet i pasqaruar. (albinfo&sda)