Londra bllokoi emërimin e përfaqësuesit të BE-së në Kosovë

Britania e Madhe ka bllokuar emërimin e përfaqësuesit të BE-së në Kosovë, post ky që ka mbetur i lirë që nga 30 prilli, pasi drejtuesit të këtij mandati, Pieter Feith i ka skaduar afati.

Që nga 1 maji, holandezi Feith drejton vetëm Zyrën e Përfaqësuesit Ndërkombëtar Civil (ICO) në Kosovë dhe në këtë detyrë do të mbetet deri në fillim të vitit të ardhshëm.

Sipas një artikulli të gazetës vjeneze Wiener Zeitung, bllokimi është bërë nga Përfaqësuesja për politikë të jashtme, Catherine Ashton për shkak se Britania e Madhe po kërkon nga pesë vendet e mbetura njohjen e pavarësisë së Kosovës.

Gazeta shkruan se qeveria britanike është duke bërë trysni enorme tek pesë vendet e BE-së, Spanja, Greqia, Rumania, Qipro dhe Sllovakia që ta ndryshojnë qëndrimin e tyre dhe ta njohin në pako Kosovën.

BE-ja ka hapur konkurs për vendin e udhëheqësit të delegacionit të Brukselit për Kosovën, që më vonë do të fuzionohet me të dërguarin e veçantë të BE-s për Kosovë.

Gazeta Wiener Zeitung njofton se përveç eurodeputetes austriake Ulrike Lunacek, e cila është raportuese e Parlamentin Evropian për Kosovën, për këtë detyrë ka konkurruar edhe diplomatja çeke Janina Hrebickova, e cila aktualisht është ambasadore në Kosovë.