Luiza Gega rrëmben medaljen e artë, 3000 metra me pengesa

Atletja e shquar shqiptare, Luiza Gega, fitoi medaljen e artë në garën e 3000 metrave me pengesa, me kohën 9’14”31, e cila gjithashtu është edhe një rekord i ri kombëtar, përcjell albinfo.ch.

Atletja kuqezi, Luiza Gega, bëri një garë të shkëlqyer. Qysh në start ajo e udhëhoqi garën, duke mos e vënë asnjëherë në dyshim fitoren e saj. Madje, nga xhiro në xhiro, ajo e thelloi distancën nga ndjekëset e saj, duke i lënë pas thuajse 50 metra.

Fitorja e medaljes së artë në Lojërat Mesdhetare të Orani nga atletja Luiza Gega, as më pak dhe as më shumë, është një konfirmim e aftësive të saj sportive, e cila edhe para katër vjetësh fitoi medaljen e artë në Lojërat Mesdhetare të Tarragonës në Spanjë.

Pas këtij suksesi të atletes Luiza Gega, numri i medaljeve të sportistëve shqiptarë në Lojërat Mesdhetare të Oranit shkoi në 3, dy të arta dhe një bronzi.