Lumi Nerodime, në gjendje të rëndë

Organizata për mbrojtjen e mjedisit “Gjethi” njofton se po ndodh një katastrofë ekologjike ndaj florës dhe faunës në lumin Nerodime.

“Gjatë tërë ditës kemi parë video dhe fotografi me pamje shqetësuese dhe të rënda për moralin shoqëror, gjendjen e mjerueshme te kulturës së ruajtjes mjedisore dhe gjendjes katastrofale mjedisore, përkatësisht të ngordhjes masive të peshqve në lumin Nerodime. Përveç që banorët u shqetësuan dhe ishin të neveritur me këto shfaqje, nëpër lumin që kalon nëpër qendër të Kaçanikut u vu re edhe një ngjyrë e errët dhe një kundërmim i rëndë i lumit, në të njëjtën kohë. Është koha e fundit që të dalim dhe të rrahim dyert e njerëzve që mund të jenë direkt të involvuar, apo edhe ata që me kënaqësi vazhdojnë të neglizhojnë këtë katastrofë ekologjike në pikë të ditës, e që përsëritet në vazhdimësi”, thuhet në reagimin e kësaj organizate, përcjell albinfo.ch.

Ata u bëjnë thirrje qytetarëve që së bashku të ndërmarrim aksion në mënyrë që të gjendet fajtorët që po e shkaktojnë këtë ndotje, e që kjo gjendje të mos përsëritet më.