Maqedoni: Ndërpritet seanca e Kuvendit, opozita gris planin francez

Seanca pritet të vijojë sërish nesër në orën 11 të paradites.

Seanca e Kuvendit të Maqedonisë së Veriut është ndërprerë teksa aty po diskutohej për planin francez për zgjidhjen e kontestit me Bullgarinë, transmeton Albinfo.ch.

Kjo seancë edhe gjatë ditës u zhvillua mes tensionesh, pasi që zhurma e shkaktuar nga opozita bëri që kryeministri të linte seancën, e cila pritet të vijojë sërish nesër në orën 11 të paradites.

Deputetët e opozitës vazhdimisht kanë kundërshtuar propozimin, madje edhe para shefes së Komisionit Evropian, Ursula von der Leyen, e cila foli para ligjvënësve për t’i bindur ata se miratimi i këtij propozimi e sjell vendin më afër BE-së.

Por, kur ajo nisi të merrte fjalën e saj, Dimitar Apasiev, deputet i partisë “E Majta”, u ngrit nga vendi dhe iu drejtua foltores, duke i lënë asaj një pankartë me mbishkrimin ‘JO’.

Këtij akti presidentja e KE-së iu përgjigj me fjalinë “Të falënderoj për këtë sjellje demokratike”, dhe e ktheu tabelën nga ana tjetër.

Ndërsa deputetja e VMRO-DPMNE-së, Dafina Stojanoska, grisi dokumentin para Parlamentin, duke i quajtur  tradhtarë deputetët e pushtetit dhe kërkoi refuzimin e propozimit. Ndërsa deputeti Ali Mehmeti nga BDI tha se propozimi duhet miratuar, pasi nuk cenon aspak maqedonasit.

---