Maqedonia e Veriut, vendi i 30-të anëtar i NATO-s

Njëzet e nëntë vendet anëtare të Aleancës Veri-atlantike kanë nënshkruar  Protokollin për anëtarësimin e Maqedonisë së Veriut në NATO.  

Ministri i Jashtëm maqedonas, Nikolla Dimitrov, e ka nënshkruar marrëveshjen së bashku me përfaqësuesit e 29 vendeve anëtare, gjatë një ceremonie të udhëhequr nga Sekretari i Përgjithshëm i Aleancës, Jens Stoltenberg. 

Sekretari i NATO-s, Stoltenberg, deklaroi se ky është një moment historik për shtetin e Maqedonisë së Veriut. “E sotmja është ditë historike. Të gjithë aleatët e NATO-s kanë nënshkruar Protokollin e Anëtarësimit të Maqedonisë, që do të garantojë më shumë siguri dhe prosperitet për gjithë rajonin. E pres me kënaqësi ditën kur 30 flamuj do të valëviten jashtë selisë së NATO-s”, ka thënë Stoltenbergu pas ceremonisë.  

Prej sot, Maqedonia e Veriut mund të marrë pjesë në të gjitha formatet kryesore të Aleancës, por nuk do të ketë të drejtë vote dhe as do të marrë pjesë në takimet më të besueshme dhe më të ndjeshme, derisa të fitojë njohuritë dhe përvojën e nevojshme.  Ky vendim i NATO-s ka ardhur pasi Greqia ka ratifikuar Marrëveshjen e Prespës, e cila i ka dhënë fund kontestit më se  27- vjeçar në ndërmjet Maqedonisë dhe Greqisë për emrin.