Marrëveshje që gratë të paguhen njësoj si burrat

Sipas marrëveshjes së arritur sot, sektori publik do të zotohet që për punën e njëjtë të paguajë rroga të njëjta si për burrat ashtu dhe për gratë

Keystone

Burrat dhe gratë për punën e njëjtë të kryer do të duhej të merrnin pagën e njëjtë. Kështu të paktën qëndron e shkruar në kushtetutën e Zvicrës. por, Këshilli Federal ka vendosur që deri në vitin 2019 të bëjë verifikimin nëse një gjendje e tillë mbretëron së paku në  administratën federale, njofton srf.ch.

Siç bën të ditur Zyra për Personel e administratës federale, për të bërë këtë verifikim janë marrë vesh sot ministri i financave Ueli Maurer dhe bashkësitë e personelit. Në muajin shtator federata tashmë kishte lancuar kartën që proklamon synimin për pagë të njëjtë që duhet të paguhet për punën m vlerë të njëjtë.

Sipas kësaj karte dhe marrëveshjes së arritur sot, sektori publik do të zotohet që për punën e njëjtë të paguajë rroga të njëjta si për burrat ashtu dhe për gratë, transmeton albinfo.ch. Në këtë mënyrë sektori në fjalë do të bëjë një hap përpara duke dhënë shembullin e vet në këtë drejtim.

Në mesin e nënshkruesve të parë të kartës së përmendur, përveç organeve federale bëjnë pjesë edhe dhjetë kantone dhe 15 komuna.