Max & Murat dhe notimi diskriminues

Nxënësit me origjinë turke dhe me emra Murat janë të diskriminuar përgjatë notimit. Një studim i ri nga “Mannheimer Bildungsforschern” tregon: Kush quhet Murat notohet me nota më të dobta nga nxënësi me emrin Max, përkundër numrit të njëjtë të gabimeve, shkruan albinfo.ch.

KEYSTONE

Aktivitet i njëjtë, nota të pabarabarta: në shkollat fillore ata që kanë emra me origjinë turke, marrin nota më të dobta.

Shkencëtarët dhe psikologët i kanë dhënë një tekst diktati një tetëvjeçareje. Teksti ishte çdoherë i njëjti dhe me gabime të njëjta. E vetmja gjë që ndryshonte ishte emri i autorit: njëherë Max, ndonjëherë Murat. Kjo pasi Max simbolizon më së miri emrat gjermanë, ndërsa Murat ata me origjinë turke, por jo vetëm. Në studim morën pjesë 204 tekste.

“Problemi nuk ishte në caktimin e gabimeve, por në notimin e nxënësve”, thotë autorja e studimit Meike Bonefeld. Pra pavarësisht se arsimtarët e kanë caktuar numrin e njëjtë të gabimeve te të dy tekstet, ai me autor Murat vlerësohej përsëri me notë më të dobët. “Kjo vërtet na ka habitur”.

Edhe vitin e kaluar nga notat e matematikës, po i njëjti studim nxori analizën se nxënësit me origjinë të huaj diskriminohen më tepër se ata që nuk e kanë këtë “barrë”. Kjo natyrisht që vlen edhe për shumë shqiptarë, emrat e të cilëve dallojnë shumë nga bashkëmoshatarët gjermanë.