Mbi 200 mijë vende pune në rrezik në Gjermani për shkak të luftës në Iran

Siguruesi i kredive pret rritje të falimentimeve në nivelin më të lartë në 14 vjet, ndërsa konfliktet globale po rëndojnë ekonominë gjermane

Më shumë se 200 mijë vende pune mund të humbasin në Gjermani gjatë këtij viti si pasojë e rritjes së falimentimeve të kompanive, të nxitura nga zhvillimet gjeopolitike, përfshirë luftën në Iran dhe tensionet tregtare globale, përcjell albinfo.ch.

Kështu raporton transmetuesi gjerman n-tv, duke iu referuar vlerësimeve të siguruesit të kredive Allianz Trade.

Sipas kompanisë, falimentimet e korporatave pritet të vënë në rrezik mbi 200,000 vende pune në Gjermani vetëm gjatë vitit 2026.

“Konflikti në Lindjen e Mesme tashmë po ka një ndikim të rëndësishëm në Gjermani dhe lufta tregtare e SHBA-së është larg të mbaruarit”, ka deklaruar Milo Bogaerts, kreu i Allianz Trade për Gjermaninë, Austrinë dhe Zvicrën.

Allianz Trade parashikon se numri i falimentimeve në Gjermani do të rritet me 2.4 përqind, duke arritur në rreth 24,650 raste, çka sipas Bogaerts do të përbënte nivelin më të lartë në 14 vjet.

Ndërkohë, të dhënat e Zyrës Federale të Statistikave tregojnë se gjykatat gjermane regjistruan 24,064 falimentime gjatë vitit të kaluar, që paraqet një rritje prej 10.3 përqind krahasuar me vitin paraprak.

Në nivel global, Allianz Trade pret që falimentimet e kompanive të rriten me 6 përqind, ritëm më i shpejtë sesa në Gjermani. Sipas kompanisë, parashikimi është rishikuar për shkak të luftës në Iran, e cila po shton presionin mbi sektorët me konsum të lartë energjie, si transporti, industria kimike dhe metalet.

Drejtoresha ekzekutive e Allianz Trade, Aylin Somersan Coqui, ka theksuar se situata aktuale po e rëndon ndjeshëm klimën ekonomike, veçanërisht në industri që varen nga stabiliteti i tregjeve të energjisë.

Megjithatë, Allianz Trade parashikon një përmirësim të situatës në Gjermani gjatë vitit të ardhshëm, duke vlerësuar se falimentimet mund të bien me 2 përqind, në rreth 24,150 raste, si rezultat i uljes së presioneve të luftës dhe masave të mundshme stimuluese ekonomike që pritet të nxisin rritjen./Albinfo.ch

---