Me ndihmën zvicerane hapet ekspozitë për krimet e luftës

Me ndihmën e Ambasadës zvicerane në Kosovë dhe Fondit për të Drejtën Humanitare, në  bibliotekën “Hivzi Sylejmani” do të hapet një ekspozitë e përhershme që dëshmon për krimet e luftës në Kosovë

Komuna e Prishtinës nënshkroi sot Memorandum Mirëkuptimi me Ambasadën zvicerane në Kosovë dhe Fondin për të Drejtën Humanitare, përmes së cilit në bibliotekën “Hivzi Sylejmani” në kryeqytet do të arkivohen materialet të ndryshme që dëshmojnë për krimet e luftës në Kosovë. Siç thuhet në një njoftim për media, aty do të ketë audio-incizime, video-incizime, si dhe materiale të tjera të shtypura edhe nga proceset gjyqësore në Hagë.

“Kjo ekspozitë do të jetë e qasshme për të gjithë ata që janë të interesuar të dinë më shumë detaje për krimet e luftës në Kosovë”, thuhet në njoftimin e Komunës së Prishtinës.

Projekti për ekspozitën e përhershme të dëshmive për krime lufte në Kosovë, është iniciuar nga ish-drejtoresha e Kulturës, Saranda Bugujevci. Kësaj të fundit, gjatë luftës së vitit 1999, forcat serbe ia kanë vrarë ia gjyshen, nënën, dy vëllezërit dhe familjar të tjerë. Për këtë krim janë dënuar gjashtë ish-pjesëtarë të Ministrisë së Punëve të Brendshme të Serbisë.