Mërgata i dha lamtumirën e fundit Lan Avdiut

Nga Lan Avdiu u përshëndetën edhe ministri në Kantonin Jura, Philippe Receveur, kryetari i Delemontit Pierre Kohler, konsulli i Kosovës në Cyrih, Sali Sefa etj.

Dhembja për vdekjen e veprimtarit të njohur të komunitetit shqiptar të Zvicrës, Lan Avdiu, ka bërë bashkë në Delemont pjesëtarë të këtij komuniteti dhe përfaqësues të institucioneve zvicerane e kosovare. Ata kishin ardhur për t`i bërë përcjelljen e fundit koordinatorit të AAK-së për degët e diasporës, i cili ndërroi jetë ditë më parë në po këtë qytet të Zvicrës.

Mbrëmja komemorative u organizua nga Bashkësia e Shqiptarëve të Kantonit Jura (BSHKJ) dhe dega e AAK-së për Zvicër.

Lamtumirën e fundit veprimtarit të shquar ia dhanë edhe ministri për planifikim hapësinor në Kantonin Jura, Philippe Receveur, kryetari i komunës së Delemontit Pierre Kohler, konsulli i Republikës së Kosovës në Cyrih, Sali Sefa, këshilltari i ministrit të diasporës në Qeverinë e Kosovës, Ahmet Asani dhe shumë bashkëveprimtarë e miq të të ndjerit.

Ngushëllimet për Lanin i pritnin bashkëshortja e tij Zyrafetja dhe djali, Arianiti.

Në tubim u lexua letra e ngushëllimit e dërguar nga ministri i diasporës, Ibrahim Makolli, i cili ka çmuar lartë rolin e të ndjerit në zhvillimet në diasporën shqiptare. Në letrat e tyre të ngushëllimit, kryetari i AAK-së Ramush Haradinaj dhe Naim Malaj, ambasador i Republikës së Kosovës në Bernë  po ashtu kanë shprehur nderimin e tyre për shembëlltyrën e Lan Avdiut.

Fjalën në këtë tubim e morën edhe Agim Pajaziti, kryetar i degës së AAK-së për Zvicër, Alije Mujaj, kryetare e Forumit të Gruas pranë kësaj dege, Ilir Bytyçi dhe Llukman Halili.

Varrimi i Lan Avdiut bëhet sot, në Gjakovë.