Mërgata, rol kyç në shtetformim

Ministri Makolli tha snë këtë konferencë se është faktografuar roli dhe kontributi i mërgatës shqiptare nëpër të gjitha proceset historike

Mërgata shqiptare ka luajtur një rol të rëndësishëm në çështjen e Kosovës gjithandej historisë, ndërsa roli i saj nuk është zbehur as në ndërtimin dhe zhvillimin e Kosovës. Kështu u tha në përfundim të Konferenca Shkencore Ndërkombëtare “Roli i Mërgatës në Shtetformim”, që u mbajt në Prizren, e cila u organizua nga Ministria e Diasporës e Kosovës.

Ministri i Diasporës, Ibrahim Makolli, në fjalën e tij përmbyllëse tha se në këtë konferencë është faktografuar roli dhe kontributi i mërgatës shqiptare nëpër të gjitha proceset që ka kaluar kombi ynë.

“Jam shumë i vetëdijshëm që jo vetëm për këto ditë sa zgjati konferenca, por po ti kishim edhe 3 mijë të tjera nuk do të mjaftonin për të paraqitur në tërësi rolin dhe kontributin që ka pas mërgata jonë jo vetëm në bërjen e lirisë, jo vetëm në bërjen e shtetit, por edhe ndërtimin e shtetit. Besojë që tash është koha kur studiuesit e ri duhet t’i rreken më me seriozitet një angazhimi të tyre në drejtim të shpalosjes së gjithë aktiviteteve që ka pas mërgata jonë “, tha ministri Makolli.

Ministri e Diasporës, sipas tij, edhe në të ardhmen do të organizojë konferenca të tilla, ndoshta me tema tjera, pasi kontributi i mërgatës, siç tha ai, ka qenë dhe vazhdon të jetë edhe në fusha tjera.

Kumtesat të cilat u lexuan në konferencë, siç tha Makolli, do të botohen nga MD në një libër të veçantë.

Kjo konferencë që zgjati katër ditë u organizua në kuadër të manifestimeve të 100-vjetorit të Pavarësisë së Shqipërisë, 134-vjetorit të Lidhjes Shqiptare të Prizrenit dhe 4-vjetorit të Pavarësisë së Kosovës.

Me punimet e tyre kanë marrë pjesë akademikë, studiues e shkencëtarë  të njohur shqiptarë dhe të huaj të cilët paraqitën më shumë se njëzet kumtesa dhe ku u vlerësua lartë kontributi i mërgatës në shtetndërtimin e Shqipërisë dhe Kosovës në faza të ndryshme.