Migrantët e plagosur nga forcat greke trajtohen në spitalet e Turqisë

Migrantët nga Siria që u plagosën nga hedhja e gazit lotsjellës nga Greqia në pikën kufitare të Edirnës, një provincë turke në kufi me Greqinë dhe Bullgarinë, u shtruan në spitalet turke.

Forcat greke të sigurisë vazhdojnë të sulmojnë migrantë të parregullt që prisnin midis portave kufitare të Pazarkule të Turqisë dhe Kastanisë së Greqisë.

Tre migrantë, përfshirë një fëmijë, u plagosën në sulm. Ata u transferuan në një spital në Edirne.

Mërgimtarët e parregullt që u plagosën më lehtë u trajtuan në vend nga mjekët.

Të enjten, të paktën 34 ushtarë turq u vranë dhe dhjetëra të tjerë u plagosën gjatë një sulmi ajror nga forcat e regjimit të Bashar al-Asadit në Idlib, një zonë deskalimi në veri-perëndim të Sirisë, përtej kufirit jugor të Turqisë.

Zyrtarët turq njoftuan të premten se nuk do t’i ndalojnë refugjatët për të arritur në Europë pas këtij sulmi. Pas këtij vendimi, mijëra të tillë ia mësynë kufijve me qëllim që të shkojnë në vendet evropiane.

Turqia tashmë pret gati katër milionë migrantë vetëm nga Siria, më shumë se çdo vend tjetër.

Ajo është ankuar se Europa nuk ka arritur të mbajë premtime për të ndihmuar migrantët dhe për të frenuar valët e mëtejshme të migrantëve, shkruan AA.