Miliona fëmijë kanë mungesë të vaksinimeve thelbësore për shkak të pandemisë

@pixabay

Afërsisht 228 milionë persona, shumica prej tyre fëmijë, janë në rrezik të preken nga sëmundje të parandalueshme, ndonjëherë kërcënuese për jetën, për shkak të pandemisë.

“Në 50 vende, fushatat e vaksinimit kundër fruthit, poliomelitit ose etheve të verdha, për shembull, nuk kanë qenë në gjendje të realizohen për shkak të pandemisë”, thanë sot OBSH, GAVI dhe UNICEF, raporton Dpa, përcjell Albinfo.ch.

“Pandemia ka përkeqësuar një situatë tashmë të keqe, duke bërë që miliona fëmijë të mbeten të paimunizuar”, paralajmëroi drejtoresha ekzekutive e UNICEF, Henrietta Fore.

Kongo, Pakistani dhe Jemeni janë vendet e prekura në veçanti.

Një nga problemet ka qenë ndërprerja e zinxhirëve të furnizimit.

Në vitin 2020, UNICEF mundi të shpërndajë vetëm 2,01 miliardë doza vaksinash, e krahasuar kjo me 2,29 miliardë në 2019.

Organizatat kanë nisur kështu një iniciativë të re me synimin që 90 % e të gjithë të miturve, në të gjithë botën, të mund të marrin vaksinat e nevojshme, duke parandaluar sëmundje të tilla si fruthi, shytat, rubeola, hepatiti, tuberkulozi dhe poliomeliti.

Kjo përpjekje duhet të ndihmojë në parandalimin e rreth 50 milionë vdekjeve deri në vitin 2030.

Për këtë qëllim, agjencitë e KB-së u bëjnë thirrje vendeve më të pasura dhe kompanive farmaceutike që të investojnë më shumë në kërkimin e vaksinave, si edhe të financojnë fushatat e vaksinimit për popullatat e vështira për t’u arritur.