Ministri Parmelin në karantinë, dyshohet për infektim me virusin e ri “britanik”

Tani ai është vendosur në karantinë për shkak të rregulloreve të ndryshuara për udhëtarët që vijnë nga Britania e Madhe

Ministri federal për Çështjet Ekonomike, Guy Parmelin ka qëndruar në Londër nga 14 deri më 15 dhjetor për të nënshkruar një marrëveshje.

Tani ai është vendosur në karantinë për shkak të rregulloreve të ndryshuara për udhëtarët që vijnë nga Britania e Madhe, të vendosura sot. shkruan srf.ch.

Një zëdhënës i ministrisë që drejton Parmelin, ka konfirmuar për SRF News raportet përkatëse të mediave, transmeton albinfo.ch. Karantina e Parmelin do të zgjasë deri më 24 Dhjetor. Por ai nuk ka simptoma të Covid-19.

Në karantinë është vendosur i gjithë delegacioni me pesë anëtarë që ishte në Londër në kohën në fjalë.

Kushdo që ka ardhur në Zvicër nga Britania e Madhe ose Afrika e Jugut që nga 14 dhjetori duhet të vendoset në karantinë për dhjetë ditë. Këtë vendim e ka marrë sot Këshilli Federal.

Kjo bëhet për të parandaluar përhapjen e variantit të sapo zbuluar, të koronavirusit, i cili konsiderohet më ngjitës se ai i pari. Ky virus i ndryshuar është zbuluar në Britaninë e Madhe dhe Afrikën e Jugut.

Parmelin është zgjedhur nga Parlamenti, në përbërje të të dy dhomave, president i federatës për vitin 2021.

---