MPJ: Kosova nuk po pengohet në OBD

Kosova ka marrë pjesë në sesionin e 132-të të Këshillit të Organizatës Botërore të Doganave, kjo e fundit e cila po mbahet në Bruksel.

Pjesmarrës në  OBD janë 182 shtete anëtare, ndërsa Kosova po merr pjesë për të katërtën herë, shkruan Albinfo.ch.

Gjatë këtij sesioni është ri-zgjedhur Sekretar i Përgjithshëm i OBD-së, Kunio Mikuriya, ndërsa është diskutuar rishikimi i Konventës së Kyotos, ndërtimi i kapaciteteve, programeve për lehtësim të tregtisë që do t’i ofrohen shteteve anëtare dhe çështje të tjera të rëndësishme në fushëveprimin doganor.

Në një njoftim të Ministrisë së Punëve të Jashtme thuhet se “Gjatë punimeve të sesionit, Republika e Kosovës ka ushtruar të drejtat e saj sikurse të gjitha vendet e tjera anëtare, duke marrë fjalën, ushtruar të drejtën e votës dhe duke u konfirmuar nga Këshilli buxheti për kontributet financiare të Kosovës”.

Po ashtu në njoftim thuhet edhe se “Përkundër përpjekjeve të Serbisë dhe Rusisë për të penguar pjesëmarrjen e Kosovës ato dështuan pas reagimit të delegacionit të Republikës së Kosovës dhe shteteve aleate dhe partnere”.

Ndërsa në mediat serbe po raportohet vazhdimisht se “është penguar anëtarësimi i Kosovës në Organizata Botërore e Doganave”.