Mustafa: Ideja e Thaçit, e rrezikshme e sjell vendin në një gjendje të padefinuar

Kryetari i LDK-së, Isa Mustafa, ka thënë se ideja e presidentit Hashim Thaçi për korrigjimin e kufijve është e rrezikshme për Kosovën, ngase e shkatërron qenien shtetërore dhe e sjell vendin në një gjendje të padefinuar. 

Në një shkrim të gjatë në Facebook, Mustafa e ka quajtur këtë ide si rrezikun më të madh që po i kanoset Kosovës pas shpalljes së pavarësisë. 

“Arsyetimi i korrigjimit të territorit me “zbulimet” se komunat në veri i kemi marrë si dhuratë nga Tito dhe Rankoviçi për të prishur përbërjen etnike të Kosovës është joserioz, për aq sa do të ishte joserioze të mendohet se ne paskemi gabuar që e kemi shpallur pavarësinë në territorin që përfshin edhe këto komuna të veriut, në tokën e Kosovës.

Kjo sjellje është mohim i Deklaratës së Pavarësisë nga goja e institucionit formalisht më të lartë të vendit”, ka shkruar Mustafa.

Kreu i LDK-së ka thënë se korrigjimi i kufijve dhe shkëmbimi i territorit nuk e përfundon raportin me Serbinë, “por e thellon amullinë e shtetit të Kosovës”.