„Nata e kristaleve“ i kushton me përjashtim nga partia

Ndërsa Prokuroria e Cyrihut ka vendosur nisjen e një procedure penale kundër kuadrit të SVP-së, Alexander Müller

Një anëtar i një kryesie lokale të SVP-UDC-së është akuzuar se gjatë vikendit të kaluar ka shkruar në rrjetin scoial twitter një fjali me përmbajtje neonaziste. Në atë fjali ai thërriste për një “Natë tjetër kristalesh. Kësaj radhe kundër xhamive”.

Me këtë rast ai i referohej “natës së kristaleve” kur, në vitin 1938 nazistët kishin vrarë qindra hebrenj dhe kishin shkatërruar një numër sinagogash të tyre.

Pas zhurmës së shkaktuar në medie, rasti i “kristaleve” do të marrë edhe përfundimin e tij gjyqësor. Prokuroria shtetërore e Cyrihut ka vendosur nisjen e një procedure penale kundër kuadrit të SVP-së Alexander Müller, për shkelje të mundshme të nenit kundër racizmit.

Por, jo vetëm kaq. Pasi rasti është shndërruar në një skandal publik, edhe partia e Müllerit, SVP-UDC ka vendosur ta përjashtojë aktivsitin e deritashëm nga radhët e saj.

Me rastin e bastisjes së bërë në shtëpinë e tij, janë konfiskuar aparatet nga të cilat ai ka emetuar tweeterët e tij tashmë të inkriminuar, njofton prokuroria.

Autori ka thënë se mediet e kanë nxjerrë nga konteksti i “tweets”-it të tij.