Nderohet humanistja zvicerane Dora Vegman

Në shenjë respekti dhe nderimi për humanisten e ndjerë zvicerane, në Frashër të Mitrovicës u përurua një rrugë me emrin e saj

Në shenjë respekti dhe nderimi për humanisten e ndjerë zvicerane, Dora Vegman, e cila kishte ndihmuar kosovarët e përndjekur gjatë luftës, të dielën në Frashër të Mitrovicës u përurua një rrugë me emrin e saj.

Në këtë ngjarje, pos kryetarit të komunës, Avni Kastrati, ishin të pranishëm edhe ministrat Bajram Rexhepi e Vlora Çitaku, si dhe zëvendës ambasadori zviceran Pjer Maurer, të cilët e çmuan kontributin e humanistes Vegman, raporton gazeta Express.

Duke folur me tej për humanisten, emrin e të cilës prej sot e mban një rrugë në Frashër, kryetari Kastrati theksoi se mbështetja që ka dhënë për pritjen e të dëbuarve nga Kosova paraqet një segment tjetër me rëndësi.

Ndërsa ministri i Punëve të Brendshme, Bajram Rexhepi, shprehu kënaqësinë që ishte i pranishëm në këtë ceremoni për emërtimin e rrugës me emrin e Dora Vegman, një personaliteti të shquar të popullit zviceran, e cila me mbështetjen e saj për njerëzit në vuajtje ka tejkaluar barrierat nacionale.

Ai tha se nisma e saj për të ndihmuar njerëzit që po vriteshin e përndiqeshin kishte gjetur përgjigje nga institucionet dhe nga organizatat joqeveritare e kishtare në Zvicër. “Miku i mirë, për ditë të vështirë”, thotë populli ynë. Kjo i përshtatet më se miri kësaj gruaje dhe humanisteje të madhe, e cila kishte arritur të shoh të lirë njerëzit e Kosovës”, është shprehur Rexhepi.

Sipas tij, lidhja e saj me njerëzit do të jetë e përjetshme dhe këtë e forcon edhe më shumë bashkëpunimi dhe ndihma e vazhdueshme e shtetit zviceran për qytetarët tanë.