Në Konsullatat kosovare është krijuar rrëmujë në mungesë të stafit

Ministria e Punëve të Jashtme e Kosovës, nuk po arrin ende të mbush boshllëkun e mungesës së stafit nëpër Konsullata.

Për këtë arsye shërbimi konsullor ka probleme të mëdha me vonesa në dhënien e dokumenteve për shtetasit kosovarë jashtë vendit.

Problemet më të mëdha mësohet të jenë në Konsullata në Austri, Zvicër, e sidomos në Gjermani, raporton Radio Kosova.

Shefi i misionit në qarkun konsullor të Frankurtit në Gjermani, Astrit Zemaj, i ka thënë kësaj radioje se problemet kryesisht vijnë nga fluksi i madh i kërkesave për dokumente.

Kurse Ilhami Gashi, sekretar permanent i Ministrisë së Punëve të Brendshme, ka thënë se stafi mbështetës që kishte dërguar në Konsullata kjo ministri, ishte kontraktuar vetëm për një periudhë gjashtë mujore.

Ndërkaq, Zëvendësministri i Punëve të Jashtme, Petrit Selimi, jep një shpjegim tjetër.

Sipas tij, Ministria e Punëve të Brendshme ka tërhequr stafin saj për shkak se i ishte nevojitur për punët e saj në Prishtinë.

Ai ka paraljemruar se do të ketë probleme edhe më tej për shkak të fluksit të kërkesave për dokumente.

“Ne po përpiqemi të gjejmë një zgjidhje në mbështetje të konsullatave“, ka thënë Selimi.

Kosova ka të akredituar trembëdhjetë misione konsullore që po ofrojnë shërbime për shtetasit kosovarë jashtë vendit.