Në Kosovë vjen një delegacion nga Dhoma e Tregtisë Zvicerane

Ky delegacion qëndron dy ditë në Kosovë, ndërsa ka parashikuar takime me ministrin e Diasporës, Valon Murati, kryetarin e OEK-së, Safet Gërxhaliu...

Një delegacion nga Dhoma e Tregtisë, Industrisë dhe Shërbimeve Zvicër-Kosovë, vjen sot në Prishtinë për të zhvilluar takime me përfaqësuesit e komunitetit të biznesit, por edhe me zyrtarë të institucioneve politike qendrore dhe lokale në Kosovë. Kjo është vizita e parë e një spektri më të gjerë nga Dhoma zvicerano-kosovare.

Ky delegacion qëndron dy ditë në Kosovë, ndërsa ka parashikuar takime me ministrin e Diasporës, Valon Murati, me kryetarin e Odes Ekonomike të Kosovës, Safet Gërxhaliu, një takim me përfaqësuesit e Ministrisë së Punëve të Jashtme, me ambasadoren e Zvicrës në Kosovës si dhe takime me biznesmenë kosovarë.

Ky takim konsiderohet i rëndësishëm për bashkëpunimin ekonomik ndërmjet dy shteteve. Zvicra pas SHBA-ve dhe Gjermanisë, mbetet njëri nga shtetet që ka ndihmuar më së shumë zhvillimin ekonomik dhe infrastrukturor të vendit. Nëpërmjet projekteve të ndryshme Zvicra ka ndihmuar Kosovën në shumë sektore, ndërsa më thekuar ka mbetur ndihma në bujqësi dhe në ujësjellës.

Buxheti i DEZA-s dhe SECO-s për vitin 2015, siç ka theksuar ambasadorja zvicerane në PR, Kristine Marty lang  kalon mbi 25 milionë franga, gjë që përfaqëson një rritje në krahasim me vitet e fundit. Ndërsa projektet e sektorit të sigurisë njerëzore, të realizuara nga EDA (Departamenti i Punëve të Jashtme) kapin këtë vit një vëllim prej 900 mijë frangash.