Në kufirin Kosovë-Mali i Zi, kapen 30 kilogram heroinë

Personi i dyshuar, me nënshtetësi malazeze, sipas njoftimit zyrtar, ka tentuar të futet në veturë dhe të ikë, por falë intervenimit të oficerëve doganorë dhe policorë të Kosovës, është ndaluar dhe arrestuar

Oficerët doganorë së bashku me Policinë e Kosovës kanë arritur të kapin rreth 30 kilogramë lëndë narkotike të llojit heroinë tek një shtetas i Malit të Zi. Droga është zbuluar gjatë kontrollimit të automjeteve që vinin nga Mali i Zi për në Kosovë.

Policia e Kosovës së bashku me oficerët doganorë, në pikëkalimin kufitar të Kullës, në afërsi të qytetit të Pejës, kanë zbuluar një sasi të konsiderueshme të drogës, të llojit heroinë. Droga ishte fshehur në disa qese të zeza në një automjet që po tentonte të futej në Kosovë nga territori i Malit të Zi.
Sipas njoftimit zyrtar, sot rreth orëve të mesditës, në pikëkalim kufitar ka tentuar të futet  në Kosovë një automjet me targa të Malit të Zi, i cili drejtohej nga një shtetas i po këtij vendi. Gjatë pyetjeve fillestare oficerët doganorë, siç thuhet, kanë vërejtur se personi ka frikë dhe e kanë ndalur për kontroll të mëtejmë.

“Oficerët kanë filluar kontrollin me pajisjet e specializuara amerikane ku në pjesët anësore të automjetit ka pasur indikacione se ka diçka të fshehur, në ato momente personi i dyshuar ka tentuar që të futet në veturë dhe të largohet, por falë intervenimit të oficerëve doganorë dhe policorë, personi është ndaluar dhe arrestuar”, thuhet në njoftimin e Doganës.

Vetura, sipas të të njëjtit njoftim, është futur për kontrolle detale, ku gjatë kontrollit në pjesën e pasme  të automjetit dhe dyerve të vozitësit, janë zbuluar 7 qese të zeza dhe nga ana e djathtë mbrapa dyerve të bashkudhëtarit po ashtu 7 qese të zeza të ngarkuara me substancën e dyshuar narkotike e llojit heroinë.
“Rasti dhe sasia prej rreth 30 kg substancë narkotike i është dorëzuar policisë derisa personi është arrestuar”, thuhet në njoftim.