Në Lucern humb me 68% një iniciativë lokale për azilin

Në mesin e një numri të madh iniciativash në nivele kantonesh dhe komunash për të cilat u votua sot në gjithsej 13 kantone, ishte edhe Iniciativa e azilit, e iniciuar nga SVP e Kantonit të Lucernit. Kjo iniciativë, me emrin e plotë “Për një politikë azili, të afërt me qytetarin” u hodh poshtë, shkruan zentralplus.ch.

Ajo, veç tjerash kërkonte që refugjatët me status të pa pranuar të azilit duhet ta ndërrojnë vendbanimin pas një viti, me qëllim që të mos bëhen “të përhershëm” në lokalitetin ku banojnë, transmeton albinfo.ch.

Iniciativa ka pësuar një fiasko të vërtetë. Kundër saj kanë votuar 68.39% të votuesve.

Ekzekutivi i kantonit ashtu si dhe Parlamenti dhe të gjitha partitë përveç SVP-së kishin qenë kundër kësaj iniciative.