Në Mesdhe shpëtuan rreth 1500 refugjatë

Rreth 1500 emigrantë u shpëtuan në Detin Mesdhe, pranë brigjeve të Libisë, në 48 orët e fundit, njoftuan të hënën natën rojat bregdetare italiane.

Të dielën dhe të hënën ata shpëtuan 1.482 njerëz në ndërhyrjet që i bënë me shumë anije të përfshira në operacionet e shpëtimit në brigjet e Libisë.

Të dielën 730 persona u shpëtuan dhe 752 të hënën, duke përfshirë shumë gra dhe fëmijë, të cilët lundroninn në gomone, raportojnë rojat bregdetare italiane në atë pjesë të Mesdheut. Nuk përmendet nga cilat nacionalitete janë emigrantët e shpëtuar.

Që nga fillimi i këtij viti në bregdetin italian kishin ardhur 14 492 emigrantë, njoftoi UNHCR. Kjo paraqet një rritje prej 42.5 për qind gjatë të njëjtës periudhë të vitit të kaluar.