Në Shqipëri, fluks i madh udhëtarësh

Fluksi i udhëtarëve ka qenë i madh në portin e Durrësit ku kanë mbërritur 4 tragete me nga 2 mijë e 200 pasagjerë si dhe 600 automjete

Në pikën doganore kufitare të Kakavijës në Shqipëri në 24 orët e fundit kanë hyrë 4 mijë e 980 persona, mes të cilëve edhe 208 shtetas të huaj.

Po në këtë hark kohor kanë dalë 3 mijë e 244 persona. Si gjithmonë pala shqiptare ka përforcuar sportelet duke punuar me 6 të hyrje dhe 4 në dalje, kurse pala greke me nga 3 sportele si në hyrje dhe në dalje, raporton BalkanWeb.

Në Kapshticë vijon normalisht qarkullimi i udhëtarëve, ndërsa fluksi ka qenë në rënie krahasuar më ditët e kaluara.

Ndërkaq pala greke ka rritur numrin e sporteleve duke e çuar në 3, pasi ditët e kaluara ka punuar vetëm me nga 2 sportele si në hyrje dhe në dalje.

Sipas Balkan Web-it, fluksi i udhëtarëve ka qenë i madh dhe në portin e Durrësit ku kanë mbërritur 4 tragete me nga 2 mijë e 200 pasagjerë si dhe 600 automjete.

Në portin e Vlorës kanë mbërritur vetëm mëngjesin e sotëm plot 680 pasagjerë me 2 tragete. Në të dy portet kryesore të vendit vijon situata e qetë ndërsa autoritetet e portit po përballojnë me sukses fluksin.