Në Shqipëri ka vende pune, por nuk ka profesionistë

Sipas kryeministrit Edi Rama, në Shqipëri nuk mund t’i përgjigjesh kërkesave për punë nëse je tornitor, elektricist apo montues panelesh

Në Shqipëri ka vende pune, por nuk ka punëtorë profesionistë. Kështu deklaroi kryeministri shqiptar Edi Rama në një aktivitet për nxitjen e punësimit. Ai tha se vende dhe nevojë për punëtorë ka në Republikën e Shqipërisë, por mungojnë kryesisht profesionistët e zanateve përkatëse.

Sipas kryeministrit Rama, në Shqipëri nuk mund t’i përgjigjesh kërkesave për punë nëse je tornitor, elektricist apo montues panelesh. Ndërsa ata që janë juristë apo me shkollime tjera, por që nuk kanë haber nga zanati, e kanë vështirë punësimin. Ai kërkon që më shumë të orientohen të rinjtë nga shkollat profesionale.

“Ky është problemi. Kemi mbjellë në vite të tëra një farsë, duke iu hapur autostrada për të hyrë në universitete me vend parkimi për të gjithë, dhe diploma pa vlerë për të gjithë. Diploma thotë që je jurist, por edhe gjysmë-analfabet”, deklaroi Rama, duke  konsideruar gabim eliminimin e shkollave profesionale dhe orientimin “kah një sistemi piramidal universitetesh”.

Sikur të ishte reformuar me kohë sistemi i arsimit profesional, sot në Shqipëri, siç thotë kryeministri Rama, do të kishte shumë më pak të papunë dhe shumë më tepër investime private, vendase dhe të huaja.

Në bazë të të dhënave të Bankës Botërore, Shqipëria ka nivelin më të ulët të papunësisë prej 16.2 për qind, dhe parashikohet që të jetë në ulje për tre vjetët e ardhshëm, transmeton albinfo.ch. Sipas BB, në rajon vetëm Bullgaria është para Shqipërisë me normë të papunësisë prej 11.6 për qind.

Maqedonia dhe Bosnja e Hercegovina, sipas BB, janë vendet e rajonit me normën më të lartë të papunësisë, normë e cila arrin në 27.9 për qind. Kroacia me 16.7 për qind, Mali i Zi me 19.1 për qind, Serbia me 22.2 për qind dhe Greqia me normë të papunësisë prej 26.3 për qind. Kosova, ndërkaq qëndron më së keqi më 30 për qind të papunë.