Vazhdon trendi i rritjes në Zvicër: 8,737 raste të reja në 72 orët e fundit

BAG ka raportuar edhe 14 raste të reja vdekjeje nga Covid-19 që kanë ndodhur gjatë fundjavës dhe deri në mesditën e sotme

Zyra Federale e Shëndetit Publik (BAG) ka raportuar 8,737 raste të reja infeksioni që kanë rezultuar pozitive për koronavirusin në ditët e fundit.

Siç dihet tashmë, BAG, prej një muaji, nuk raporton më rastet gjatë fundjavës, shkruan albinfo.ch. Prandaj, numri i të hënës përfshin regjistrimet e mbetura nga java e kaluar dhe nga fundjava.

Mesatarja e numrit të infeksioneve të regjistruara gjatë 7 ditëve arrin kështu në mesataren ditore prej 2473 rastesh, njofton srf.ch. Kjo është për 130 për qind më shumë se në javën e kaluar.

Si përfundim: Trendi po rritet shumë shpejt dhe në një nivel shumë të lartë, konstaton BAG.

Shkalla e rasteve që kanë rezultuar pozitive nga testimet e kryera në shtatë ditët e fundit, është 14.7 për qind. Kjo do të thotë se nga 100 teste, mesatarisht rreth 15 teste ishin pozitive, transmeton albinfo.ch.

Numri i testimeve në një mesatare 7 ditore është 16,868 teste në ditë dhe kështu është rritur për  38 për qind krahasuar me javën e mëparshme.

BAG ka raportuar edhe 14 raste të reja vdekjeje nga Covid-19 që kanë ndodhur gjatë fundjavës dhe deri në mesditën e sotme, përcjell albinfo.ch.

Numri i pranimeve në spital gjatë javës së fundit është 38 persona në ditë. Kjo është 98 për qind më shumë se në javën e kaluar.

---