Nëntë zviceranë ndalohen në Hambourg, pas dhunës gjatë samitit G20

KEYSTONE

Gjatë skenave të dhunës në marshim të samitit G20 në Hambourg të Gjermanisë, policia i ka ndaluar nëntë shtetas zviceranë. Pesë nga ta janë arrestuar dhe katër të tjerë mbetën nën mbikëqyrje të policisë

Ditët e fundit konfrontime të dhunshme kanë plasur në margjina të samitit G20, i cili u mbajt më 7 dhe 8 korrik në Hambourg, në veri të Gjermanisë.

Ndër personat që janë ndaluar shkaku i dhunës së manifestuesve në Hambourg, ka edhe shtetas zviceranë. Është kjo hera e parë që policia e Gjermanisë pohon se ka edhe helvetë në mesin e të arrestuarve.

Policia nuk ka komunikuar natyrën e akuzave ndaj tyre. Tani për tani, në tërësi 186 persona janë arrestuar dhe 225 janë nën mbikëqyerje.

Qindra policë, të lënduar

Huliganët kanë djegur vetura, kanë dëmtuar dhe kanë plaçkitur dyqane si dhe kanë hedhur fishekzjarre dhe shishe mbi policë. Forcat e sigurisë kanë përdorur disa herë topat e ujit. Gjatë manifestimeve të shumta afro 500 policë janë lënduar.