“Nez Rouge” ka bartur vullnetarisht në shtëpitë e tyre 20.500 festues të dehur

Vetëm në natën e shenjtë dhe në atë të Krishtlindjes (24 dhe 25 dhjetor) janë transportuar afër 4000 persona në këtë mënyrë, njofton “Nez Rouge”

Keystone

Oferta që ju mundëson të transportoheni me makinën tuaj por nga një ngasës tjetër, po bëhet gjithnjë më e preferuar në Zvicër. Fjala është për transportimin e atyre që nuk ndihen të sigurt të ngasin makinat e tyre pas ndonjë mbrëmjeje festive me alkool.

Nga fillimi i dhjetorit këtë mundësi e kanë shfrytëzuar 20.500 veta, shkruan srf.ch.

Vetëm në natën e shenjtë dhe në atë të Krishtlindjes (24 dhe 25 dhjetor) janë transportuar afër 4000 persona në këtë mënyrë, njofton “Nez Rouge”, organizata që merret me këtë punë. Që nga një dhjetori, në dispozicion për të transportuar në shtëpi njerëzit nga ndonjë festë kanë qenë më shumë se 6200 shoferë vullnetarë.

“Nez Rouge” ekziston nga viti 1990 dhe ndërkohë është zgjeruar në gjithë Zvicrën. Por shërbimi që ofron kjo organizatë, ndrshon nga kantoni në kanton. Kështu, ndërkohë që në Kantonin Aargau, shoferët e “Nez Rouge” janë aktivë gjatë gjithë dhjetorit, në kantonet tjera kjo ndodh vetëm në ditët e fundjavës dhe në ato festive.