Nget motorin sa dyfishi i lejuar, i merret leja kosovarit

Ai me motorin e tij ka zhvilluar shpejtësinë prej 175 kilometrash në orë në një vend ku lejohej vetëm 80 km në orë

Pasditen e të dielës ka mbretëruar një mot shumë i bukur që ka joshur të gjithë për të dalë në natyrë  dhe për të shijuar rrezet aq të pritura të diellit. Motoristët duke ngarë motorët e tyre në grupe bëjnë gjithsesi pjesë në panoramën e një të diele e diell. Dhe pasi që ata dinë shpesh “t`ia shkelin” gazit pak më shumë se që duhet, diku aty afër janë dhe policët që masin shpejtësinë.

Këta të fundit, në Etzgen të kantonit Aargau kanë bërë të dielën një kontrollim, duke bërë dhe një “listë” me ngasësit që kanë tejkaluar më së shumti shpejtësinë e lejuar. Dhe, “rekordin” e palavdishëm e ka shënuar një kosovar 21 vjeç. Sipas radarit të policisë ai me motorin e tij ka zhvilluar shpejtësinë  prej 175 kilometrash në orë në një vend ku lejohej vetëm 80 km në orë. Pasi ka tejkaluar me 95 kilometra në orë limitin e lejuar, i riu është nxjerrë nga komunikacioni dhe i është marrë në vend të ngjarjes patentëshoferi.

Prokuroria e përgjithshme Rheinfelden-Laufenburg ka hapur me këtë rast një hetim penal ndaj kosovarit dhe i ka sekuestruar atij motorin e tipit Suzuki.

Gjatë këtij kontrollimi, policia ka kapur pesë veta që kane tejkaluar shpejtësinë e lejuar.