Nismë e re në Zvicër: taksë për fluturimet, për të favorizuar trenat

Iniciatorët argumentojnë se aktualisht fluturimet shpesh janë më të lira se udhëtimi me tren, pavarësisht se transporti hekurudhor është shumë më miqësor ndaj mjedisit

Një iniciativë e re është lançuar në Zvicër që synon vendosjen e një takse mbi transportin ajror, me qëllim mbështetjen e transportit publik dhe reduktimin e ndikimit në mjedis.

Nisma, e quajtur “Për transport publik të fortë dhe çmime të drejta të fluturimeve”, është propozuar nga organizata mjedisore Straffico dhe synon të financojë zgjerimin e rrjetit hekurudhor përmes të ardhurave nga taksimi i biletave ajrore.

Sipas propozimit, taksa do të aplikohej për fluturimet dhe edhe për avionët privatë, ndërsa fondet e mbledhura do të përdoren për të përmirësuar lidhjet hekurudhore, përfshirë edhe ato ndërkombëtare, dhe për ta bërë transportin publik më të përballueshëm, shkruan swissinfo.ch, transmeton albinfo.ch.

Iniciatorët argumentojnë se aktualisht fluturimet shpesh janë më të lira se udhëtimi me tren, pavarësisht se transporti hekurudhor është shumë më miqësor ndaj mjedisit.

Për të çuar përpara këtë nismë, do të nisë mbledhja e nënshkrimeve – një hap i domosdoshëm në sistemin e demokracisë direkte në Zvicër, ku qytetarët mund të propozojnë ndryshime ligjore përmes referendumit.

---