Zvicër: Nuk do të ketë shtrenjtim të biletave të transportit publik më 2023

Sipas Alliance Swiss Pass, në këtë mënyrë sektori i transportit publik dëshiron të rifitojë klientët që ka humbur për shkak të pandemisë

Për të gjashtin vit radhazi, shoqatat e tarifave dhe transportit në kuadër të të Alliance Swiss Pass heqin dorë nga rritja e përgjithshme e çmimit të biletave. Kështu synohet rritja e kërkesës për udhëtime me transport publik.

Sipas Alliance Swiss Pass, sektori i transportit publik dëshiron të rifitojë klientët që ka humbur për shkak të pandemisë, transmeton albinfo.ch. Ky vendim u mor përkundër rrethanave të vështira ekonomike nëpër të cilat po kalon edhe transporti publik, shrkuan srf.ch.

Që nga ndryshimi i fundit i orarit, fëmijët deri në ditëlindjen e tyre të gjashtë udhëtojnë në të gjitha rastet, pa pagesë. Në të njëjtën kohë, çmimi për Swiss Travel Pass është bërë deri në 21 për qind më i lirë, përcjell albinfo.ch. Gjithashtu ofertës i është shtuar “bileta kursyese” prej 29 frangash dhe ulja e çmimit për rastin e ndryshimit të klasës së transportit (nga klasa B në atë A).

Sfidat ekonomike

Pandemia e Covid 19 la gjurmë edhe në kompanitë dhe shoqatat e transportit. Gjithashtu, rritja e çmimit të naftës rëndon transportin publik rrugor me kosto shtesë. Çmimet e konsumit në Zvicër janë rritur gjithashtu për 1.7 për qind që nga viti 2016 dhe Sekretariati Shtetëror për Çështjet Ekonomike (Seco) pret një rritje të mëtejshme prej 1.1 për qind për vitin 2022, sipas Alliance Swiss Pass.

---