Nuk ka para nga Brukseli, kolapson Greqia?

Ministrat e financave të eurozonës kanë refuzuar kërkesën e Greqisë për shtyrjen e afatit për shlyerjen e borxhit ndaj FM-së. Në Athinë, si duket tashmë janë duke punuar në propozimet e mëtejshme për të përmbushur kërkesat e kreditorëve. Edhe një marrëveshje për referendum nuk është përjashtuar.

Brukseli ka hedhur poshtë propozimet e fundit nga Athina. Kjo u njoftua nga shefi i euogrupit, Jeroen Dijsselbloem.

Greqia mund të falimentojë dhe rrezikon të humbë qasjen e fundit në burimet e rreth 18 miliardë eurosh. Për një zgjerim të mëtejshëm të programit ishte shumë vonë, tha Dijsselbloem.

Qeveria e Greqisë kishte kërkuar marrëveshje të re për ndihmë nga Eurozona, vetëm pak orë para se t’i kalojë afati për shlyerjen e borxhit ndaj Fondit Monetar Ndërkombëtar.
Greqia ka kërkuar ndihmë dyvjeçare në vlerë prej 29.1 miliardë eurosh.
Greqia kishte afat deri në mesnatë t’i paguajë borxhin Fondit Monetar Ndërkombëtar në vlerë prej 1.6 miliardë eurosh, ose rrezikon të dalë nga Eurozona.
Kreditorët ndërkombëtarë duan që Greqia të rrisë taksat dhe të zvogëlojë shpenzimet e mirëqenies, para se të zhbllokojnë fondet e ndihmës për të.