Gjenden trupat e pajetë të tre punëtorëve që pësuan në aksidentin e djeshëm

Në mbrëmjen e të enjtes, janë gjetur të vdekur të tre punëtorët, njofton Policia Kantonale e Schwyz-it në një njoftim për media të premten në mëngjes

Tre punëtorë janë mbuluar nga dheu pas shembjes së një grope gërmimi të enjten në mëngjes në Feusisberg SZ. Fillimisht ishte bërë e ditur se dy persona kishin humbur jetën dhe një i tretë konsiderohej zhdukur, shkruan albinfo.ch.

Por, në mbrëmjen e të enjtes, janë gjetur të vdekur të tre punëtorët, njofton Policia Kantonale e Schwyz-it në një njoftim për media të premten në mëngjes.

Rreth 90 persona ishin angazhuar për nxjerrjen e viktimave. Për sqarimin e shkakut të vdekjes dhe identifikimin e tyre, viktimat janë dërguar në Institutin e Mjekësisë Ligjore në Universitetin e Cyrihut. Ka nisur një hetim penal.

Para se të mund të realizohej shpëtimi, vendi i aksidentit është dashur të kontrollohej dhe të sigurohej. “Për arsye sigurie, shpëtimi i viktimave do të marrë kohë”, kishte shkruar Kapo Schwyz të enjten pasdite.

Në kantierin e ndërtimit ishte duke u ngritur një pikë karburanti.

(Foto: Kapo Schwyz)

---