OBSH: 780 raste të infektimit nga Lia e majmunit

Shifrat e fundit nuk përfshijnë infektimet në vendet afrikane ku virusi konsiderohet endemik.

Organizata Botërore e Shëndetësisë (OBSH) konfirmoi 780 raste të lisë së majmunëve në 27 vende të botës deri të dielën.

Zyrtarët e OBSH-së paralajmëruan se rreziku i shëndetit publik “mund të bëhet i lartë nëse ky virus shfrytëzon mundësinë për t’u vendosur në vendet joendemike si një patogjen i përhapur njerëzor”.

Lia e majmunëve konsiderohet një sëmundje më pak e rëndë në krahasim me linë, e cila u zhduk në vitin 1980.

Ky infeksion transmetohet nga personi në person përmes kontaktit të ngushtë fizik.
Simptomat zakonisht zhduken brenda disa javësh, por herë pas here mund të çojnë në komplikime dhe vdekje në raste shumë të rralla.
Askush nuk ka vdekur në mesin e 780 rasteve të raportuara, raporton Euronews, përcjell Albinfo.ch.

Në Kosovë deri më tani ka vetëm dyshime për një rast të lisë së majmunëve, rast ky që është dërguar për testim jashtë vendit.

---