Shefi i programit të urgjencave në OBSH, Mike Ryan, tha se ekipi ishte “shumë i kënaqur” me bashkëpunimin e zyrtarëve kinezë deri më tani, por shkuarja dhe vendosja e një ekipi më të madh, do të kërkonte kohë.

Kina është kritikuar për mënyrën sesi e ka menaxhuar situatën me pandeminë, që nga paraqitja e rasteve të para të raportuara me koronavirusin e ri, që e shkakton sëmundjen COVID-19.

Më së shumti kritika në drejtim të Kinës kanë bërë Shtetet e Bashkuara.

Në fakt, presidenti amerikan, Donald Trump ka akuzuar edhe OBSH-në për bashkëpunim me Kinën në fshehjen e informacioneve për pandeminë.

Mu për këtë, ai vendosi për tërheqjen e SHBA-së nga anëtarësia në OBSH.

Më 17 korrik Shtetet e Bashkuara thyen rekordin e tyre ditor të rasteve të reja me koronavirus, duke regjistruar të enjten mbi 77,000 të tilla, ndërkohë që numri i viktimave shkoi në gati 1,000.

Në total, gati 3.6 milionë të infektuar dhe mbi 138,000 viktima janë regjistruar në SHBA, prejse pandemia ka arritur atje në fillim të këtij viti.

Sipas të dhënave të Universitetit Johns Hopkins, koronavirusi në gjithë botën ka prekur mbi 13.8 milionë njerëz.