OEK e shqetësuar, ka përkeqësim të gjendjes së bizneseve

Kryetari i Odës Ekonomike të Kosovës, Berat Rukiqi, ka thënë se është i shqetësuar, pasi në dy muajt e fundit ka rritje të krimit dhe pasigurisë te bizneset në Kosovë.

Gjatë publikimit për indikatorin e matjes së Klimës të Biznesit, Rukiqi ka thënë se në çdo indikator ka ulje.

Ai theksoi se ka pasur përkeqësim të gjendjes së bizneseve në tremujorin e dytë të këtij viti. Sipas tij, vetëm 26 për qind e bizneseve presin shtim të numrit të punësimit.

E tri barrierat kryesore mbesin konkurrenca jolojale, mungesa financiare dhe ekonomia informale.

“Një shqetësim është rritja e numrit të grabitjeve, e kemi ngritur këtë shqetësim. Vetëm nga gushti e deri në shtator, shtatë grabitje kanë ndodhur te bankat që kanë krijuar mjaft shqetësime”,  ka deklaruar Rukiqi.

Ai ka thënë se Kosova nuk e ka imazhin e mirë dhe nëse vazhdohet kështu, mund të ndikojë në tërheqjen e investimeve të huaja.