Opozita e quan ‘antisocial’ projektbuxhetin 2019

Deputetja e Partisë Demokratike të Shqipërisë, Grida Duma, e ka cilësuar projekt-buxhetin e vitit 2019 të propozuar nga qeveria si antisocial.

Sipas saj, Shqipëria është e fundit në rajon për pensionet, pasi Buxheti i indekson pensionet me rreth 2%, ndërsa çmimet janë rritur deri në 42%, përcjell albinfo.ch.

“Buxheti antisocial 2019 godet profesionistët me taksim gjobitës në paga, godet më të varfrit në ndihmën ekonomike dhe në pagën minimale, mohon borxhin historik të të përndjekurve politikë dhe favorizon një pakicë shërbyesish të pushtetit. Buxheti i Rilindjes godet më të pamundurit. Nga 103 mijë familje, sot marrin ndihmë ekonomike rreth 80 mijë. Këta dhe të tjerët mbahen peng i një skeme të fshehtë pikësimi për t’i përdorur si peng vote”, ka thënë Duma.

Ndërsa fondin e përcaktuar për dëmshpërblimin e ish të përndjekurve politikë, Duma tha se duhen 3 dekada për të shlyer faturën financiare.