Opozita kosovare e quan “sukses” kalimin e Kosovës në Asamblenë e Përgjithshme

Krerë të partive opozitare kanë reaguar menjëherë pas kalimit të suksesshëm të fazës së dytë në Asamblenë e Përgjithshme të KiE-së.

“Me mbi 2/3 të votave, Asambleja Parlamentare e Këshillit të Evropës miratoi sot Raportin që i hap rrugë anëtarësimit të Kosovës në këtë organizatë. Mirënjohje për të gjithë ata që kanë punuar me vite të tëra për këtë sukses të rëndësishëm për vendin tonë. Falënderim për të gjithë ata që me votën e tyre sot e shtynë përpara këtë proces për Kosovën”, ka shkruar Memli Krasniqi i PDK-së.

Ndërsa kreu i AAK-së, Ramush Haradinaj, theksoi se përkrahja e sotme në Asamblenë e Këshillit të Evropës është një hap kolosal në afirmimin ndërkombëtar të pozicionit të Republikës së Kosovës, si dhe një energji dhe momentum i ri për caqet e së ardhmes.

“Shteti ynë i ri, qytetarët e Kosovës, kanë vendosur themelet e forta të demokracisë, të drejtave dhe lirive të njeriut. Ky përkushtim i rrënjosur në frymën e Kushtetutës e shpirtin e qytetarëve u vlerësua nga shtetet anëtare të Këshillit të Evropës”, shkruan Haradinaj.