Opozita me dyshime rreth Projekt-buxhetit për vitin 2011

Partitë opozitare kanë dyshime të mëdha rreth projekt-buxhetit të propozuar nga Qeveria e Kosovës për këtë vit.

Gjatë debatit të sotëm në Kuvend, LDK, Vetëvendosje dhe AAK kanë thënë se buxheti i propozuar është joreal dhe nuk plotëson nevojat e qytetarëve të Kosovës dhe është në shpërputhje me të dalat buxhetore që planifikohet të ndahen për rritjen e rrogave në sektorin publik dhe investimet kapitale.

Para deputetëve, kryeministri Hashim Thaçi ka kërkuar që të votohet ky projekt-buxhet, që, sipas tij, adreson nevojat e qytetarëve. Sipas tij, debatet me Fondin Monetar Ndërkombëtar (FMN) janë shumë serioze dhe po diskutohet me argumente. Thaçi siguroi qytetarët se Qeveria ka partneritet me institucionet ndërkombëtare, duke përfshirë edhe FMN.

Thaçi ka thënë se të dhënat aktuale dëshmojnë se ekonomia e Kosovës, edhe përkundër tronditjeve në tregjet ndërkombëtare, ka arritur të gjenerojë një rritje reale ekonomike mbi katër për qind gjatë vitit 2010. Ndërsa për vitin 2011, departamentet e specializuara brenda institucioneve parashohin një rritje reale ekonomike prej 5.3 për qind. Ai vlerësoi se buxheti i vitit 2011 është punuar mbi analizën e këtyre zhvillimeve, si dhe është formuluar në funksion të rritjes ekonomike të vendit.

“Ky buxhet ka për synim ruajtjen e qëndrueshmërisë makro-fiskale të vendit, duke siguruar të hyra buxhetore në vlerë prej 1 miliard e 26k milionë euro, të hyra këto 12 për qind më të larta se të hyrat e vitit të kaluar”, u shpreh Thaçi.

Sipas tij, shpenzimet buxhetore janë planifikuar të arrijnë nivelin prej 1 miliard e 436 milionë euro, apo rreth 19 për qind më të larta në krahasim me vitin e kaluar. Thaçi ka thënë se kjo rritje e shpenzimeve në masë të madhe i atribuohet investimeve kapitale madhore siç është Autostrada “Ibrahim Rugova”, pastaj investimeve tjera infrastrukturore, siç janë rrugët Prishtinë-Pejë, Prishtinë-Mitrovicë, ndërtimi dhe mirëmbajtja e rrugëve, urave, ndërtimi dhe rehabilitimi i objekteve shkollore, spitaleve, qendrave të mjekësisë familjare dhe shumë projekteve tjera me rëndësi vitale për vendin tonë.

Pas debatit, pritet që deputetët të votojnë projekt-buxhetin e propozuar nga Qeveri.