Orges Arifi merr medaljen e argjendtë në Kampionatin Evropian të karatesë

Foto FB: Federata Shqiptare e Karatese

Orges Arifi ka fituar sot sërish medaljen e argjendtë në Kampionatin Evropian të karatesë.

Në Yerevan të Armenisë, Arifi, përfaqësues i Shqipërisë, pësoi disfatë në finalen e kategorisë deri në 60 kilogramë nga Akhmed Akhmedov.

Rusi, që garon me flamurin e Federatës Evropiane të Karatesë (EKF) dhe që në gjysmëfinale e kishte eliminuar karateistin tjetër të Kosovës, Islam Selmanin, fitoi me rezultatin 2:1 pas luftës, transmeton albinfo.ch.

Për Arifin ishte paraqitja e dytë në finale të Kampionatit Evropian të karatesë. Deri në finalen e Evropianit të kategorisë deri në 60 kilogramë në Armeni, Arifi i fitoi katër luftëra. Me rezultat 2:1 e eliminoi Balsha Vojinoviqin e Malit të Zi në raundin e parë. Në raundin e dytë fitoi 4:2 ndaj karateistit çek, Martin Drabeg. Luftë të fortë zhvilloi edhe me spanjollin Urko Primicia Velasco, të cilin e mundi 1:0.

Në gjysmëfinale fitoi 5:3 ndaj karateistit të Bosnjë-Hercegovinës, Kenan Shiljak.

Ndryshe, vitin e kaluar, Arifi e fitoi medaljen e argjendtë në Evropianin që u organizua në Zarë të Kroacisë.