Orteku në Itali merr jetën e pesë alpinistëve

Ilustrim

Një ortek në malet Dolomite të Italisë ka vrarë pesë alpinistë gjermanë, përfshirë një vajzë 17-vjeçare dhe babain e saj, sipas ekipeve të shpëtimit.

Ngjarja ndodhi të shtunën rreth orës 16:00, kur alpinistët po ngjiteshin në Cima Vertana në Alpet Ortler në grupe të ndara dhe u goditën nga një ortek i shpejtë dëbore, raporton BBC.

Sipas Shërbimit Alpin të Shpëtimit Italian (Soccorso Alpino e Speleologico), një grup prej tre personash u përfshi plotësisht nga orteku dhe të gjithë humbën jetën.

Ndërkohë, babai dhe vajza e tij u morën gjithashtu nga orteku, dhe trupat e tyre u gjetën të dielën. Dy alpinistë të tjerë që ndodheshin në një grup të tretë mbijetuan.

Operacioni i shpëtimit u nis menjëherë nga të mbijetuarit, duke paralajmëruar ekipet e emergjencës.