Pako ushqimore për britanikët e shqetësuar

Kanë mbetur vetëm 9 javë derisa Britania të largohet nga Bashkimi Evropian,  e një kompani po ua shet britanikëve të shqetësuar pakon ushqimore për t’i ndihmuar ata të përgatiten për më të keqen. E quajtur “Brexit Box”, pakoja kushton 380 dollarë dhe siguron ushqim për 30 ditë, sipas ideatorit të saj, biznesmenit James Blake, i cili thotë se tashmë ka shitur qindra prej tyre.

Në kohën kur ende s’ka marrëveshje për mënyrën se si Britania do të tregtojë me BE-në sapo të largohet, shitësit dhe prodhuesit kanë paralajmëruar se Brexit-i pa marrëveshje mund të shkaktojë mungesa të ushqimit dhe barnave. Kjo, për shkak të kaosit që pritet në porte, e që mund t’i paralizojnë linjat e furnizimit, përcjell albinfo.ch

“Brexit Box” përfshin 60 elemente të kuzhinës britanike, përfshirë pulë, djathë makarona dhe të tjera.  “Tani ne jemi në një proces që askush nuk ka kontroll mbi të, nuk kemi asnjë ide se çfarë po ndodh, por ju mund të kujdeseni për vete”, tha Blake. Klientja Lynda Mayall, 61-vjeçare, e cila injoroi garancitë e qeverisë se nuk ka nevojë për të grumbulluar ushqim për Brexit, tha se ajo ishte e shqetësuar se “ndoshta gjërat nuk do të ishin aq të disponueshme sa janë tani”.