Papa në Shkup, për shkak të Nënë Terezës

Maqedonia e Veriut do të jetë vendi i 42-të, të cilin do ta vizitojë Papa Françesku që nga vendosja e tij si kreu i kishës katolike në vitin 2013.  Tashmë qyteti i Shkupit i ka bërë të gjitha përgatitjet për ta pritur më 7 maj kreun e kishës katolike.

Papa në prag të vizitës së tij ka dhënë edhe një mesazh për të gjithë qytetarëve të Maqedonisë, transmeton albinfo.ch.

Ai ka thënë se vizitën ia kushtoi një shenjtore të madhe siç është Nëna Terezë, e cila ka lindur dhe është rritur në qytetin e Shkupit.

“Vizitën time ia kushtoj një shenjtore të madhe, një bije të vendit tuaj, Nënës Terezë, e lindur dhe e rritur në Shkup, e cila me ndihmën e Perëndisë u bë misionare e guximshme e Krishtit në botë, duke u dhënë shpresë dhe dinjitetin të varfërve. Të dashur miq, le të përgatisim takimin tonë me lutje që ky takim të jetë i mbushur me paqe dhe të mira për të gjithë njerëzit tuaj“, thuhet ndër të tjera në mesazhin e Papës.