Papunësia në Rusi mund të rritet për shkak të sanksioneve

(KEYSTONE/Jean-Christophe Bott)

Ministri rus i Ekonomisë, Maksim Reshetnikov, thotë se në Rusi mund të ketë shkurtime të vendeve të punës dhe rënie të investimeve të huaja, për shkak të sanksioneve të vendosura nga vendet perëndimore.

Gjatë një konference për mediat, Reshetnikov u shpreh se papunësia qëndron në nivelin e 4%, por mund të ndryshojë.

“Një krizë e zgjatur mund të çojë në një ulje të punësimit. Ne shohim se këtu ka rreziqe”, shtoi ai.

Ekonomia e Rusisë është goditur nga sanksionet e vendosura nga vendet perëndimore që prej muajit shkurti, kur Moska nisi pushtimin e Ukrainës.

Sanksionet e para detyruan tregun e aksioneve në Rusi të mbyllej përkohësisht, me njerëzit të cilët mbanin radhë në bankomate për të tërhequr kursimet e tyre.

Megjithatë, rubla është kthyer në nivelet e paraluftës falë ndërhyrjeve të Bankës Qendrore të Rusisë./BBC