Paralajmërohet se papunësia mund të shkojë në 50% shkaku i pandemisë

Kriza ekonomike me të cilën pritet të ballafaqohet Kosova shkaku i pandemisë do të godasë edhe më shumë tregun e punës në vend.

Sipas kryetarit të BSPK-së, Avni Ajdini, pas përfundimit të situatës së krijuar me COVID-19, shkalla e papunësisë në Kosovë mund të rritet deri në 50 për qind, transmeton KOHA.

Shkak për këtë ai tha se do të jetë pikërisht sektori privat, si një nga punëdhënësit kryesor në vend.

E, kritika për Qeverinë për mospërkrahje të këtij sektori ka pasur edhe sindikata që përfaqëson ata.

Jusuf Azemi, kryetar i Sindikatës së Pavarur të Sektorit Privat, ka thënë se secila qeveri ka shkelur të drejtat e punëtorëve të sektorit privat duke dështuar t’u sigurojë atyre pagë mesatare prej 250 eurosh.

Në një konferencë për media, ai shtoi se në sektorin privat gjithashtu vazhdimisht shkelet Ligji i punës.

Kurse, ministrja e Ekonomisë, Rozeta Hajadari, ka kritikuar udhëheqjet e kaluara, duke thënë se qeveria trashëgoi shumë probleme që lidhen me gjendjen e punëtorëve.

Hajdari njoftoi se MEPTINIS-i është në proces të draftimit të Ligjit të punës, në përpjekje për të siguruar kushte e të drejta më të mira për ta.

Për Ditën ndërkombëtare të Punëtorëve, të premten kanë folur edhe presidenti Hashim Thaçi e kryeministri në detyrë, Albin Kurti.

Të dy kanë premtuar kushte më të mira për punëtorët e përmirësim të gjendjes së tyre.

https://youtu.be/HVovS6SUCmI

---